Өнөө үеийн эцэг эхчүүд, бас зарим өвөө эмээ нар хүүхэд байхдаа үдэш бүр Монголын Үндэсний радиогоор явдаг “Үлгэрийн цаг”-ийг сэтгэл догдлон сонсдог байсан болов уу. “Үлгэрээс санах сэрэх юм их бий…” гээд л эхлэх хөтлөгчийнх нь хоолой одоо ч тодхон сонстох шиг болдог. “…Маш сайн магадлан дуулаад маргаашийн үлгэрийг сонсоорой” гээд төгсгөх тэр л мөчөөс маргаашийн үлгэрийг хүлээж эхэлнэ дээ…
Мэдээж, үлгэр хүүхдийн оюун сэтгэхүйг хэрхэн хөгжүүлдгийг бид хэнээр ч хэлүүлэлтгүй мэднэ. Тэгвэл, Та яг л тэр үеийг санагдуулам гайхалтай, орчин үетэй уялдсан “Эрдмийн долгион” аудио цуврал хичээлийг Үндэсний радиогоор 5 сарын 10-наас өдөр бүр 18.50 цагт хүүхдүүддээ сонсгоорой. Юу гэвэл, хүүхдэд зориулсан бүтээлүүдээрээ бяцхан үзэгч, сонсогчдынхоо талархлыг хүлээсээр ирсэн Марчаахай ХХК-иас “Теле хичээл болон зайны сургалтад хамрагдах боломжгүй хүүхдүүдийн сурах үйл явцыг дэмжих 30 аудио контентыг боловсруулах” төслийг НҮБ-ын Хүүхдийн Сан, Боловсрол Шинжлэх Ухааны Яамны дэмжлэгтэйгээр амжилттай хэрэгжүүлээд байгаа аж. Тэд 4-5, 6-7 насны хүүхдэд зориулсан тус бүр 15 аудио хичээлийг боловсруулж, сургуулийн өмнөх насны болон бага ангийн сурагчдад хүргэж эхэлжээ.
Сургалтын агуулгыг сонирхолтой байдлаар хүргэх үүднээс аудио хичээлийг цуврал зохиол болгон олон улсын “Story Telling” буюу үлгэр, өгүүллэгийг сургалтын агуулгаар баяжуулж хүүхэд түүнээс үлгэрлэх, зөв хувь хүн болж төлөвшихөд дэмжлэг болох арга зүйг ашиглан боловсруулж, зохиолуудыг зорилтот насны хүүхдүүдэд урьдчилан сонсгоод, тэдний хариу үйлдэл, сургалтын агуулгыг бүрэн хүлээж авах эсэхийг туршиж үзсэний үндсэн дээр илүү сайжруулан бүтээснээрээ онцлогтой. Уг төслийг бүтээхэд зохиолч, багш аргазүйч, дуу оруулагч, төслийн багийн гишүүд гээд 20 гаруй уран бүтээлч, мэргэжилтнүүд ажиллажээ.
Дээрх 30 аудио хичээлийг Үндэсний радиогоос гадна econtent.edu.mn, marchaakhai.mn цахим хуудаснууд, марчаахай аппликейшн болон бусад боловсрол, сургалтын платформуудаар дамжуулан хүүхэд багачуудын хүртээл болгоод эхэлсэн. Түүнчлэн, тус төслийн хүрээнд НҮБ-ын Хүүхдийн Сантай хамтран ажилладаг дөрвөн аймаг болон Улаанбаатар хотын нэг дүүргийн хүүхдүүдэд зориулан 1300 ширхэг радио төхөөрөмжид аудио хичээлүүдийг суурилуулан хүргүүлэхэд бэлэн болоод байна.
Энэхүү төсөл нь Нидерландын Вант Улс, Данийн вант Улс, Швейцарын Холбооны Улс, Норвегийн Вант Улс, Шведийн Вант Улс, Бүгд Найрамдах Солонгос Улс, Бүгд Найрамдах Финланд Улс, Шинэ Зеланд Улс, Хорватын Бүгд Найрамдах Улс, Бүгд Найрамдах Исланд Улс, Тайландын Хаант Улс, Бүгд Найрамдах Словак Улс, Камбожийн Вант Улсын Засгийн газруудаас НҮБ-ын Хариу Арга Xэмжээ, Нөхөн Сэргээх Санд оруулсан хандивын дэмжлэгтэйгээр хэрэгжсэн болно.